Vətənim Media xəbər verir ki, “AzerGold” QSC ilə Asiya İnkişaf Bankı (AİB) dağ-mədən sənayesi, eləcə də kritik mineralların hasilatı və emalı sahələrində əməkdaşlıq imkanlarını müzakirə edib. Görüş “AzerGold”un İdarə Heyətinin sədri Zakir İbrahimovla AİB-in Azərbaycan üzrə ölkə direktoru Sunniya Durrani-Camal arasında keçirilib.
Tərəflər Balakəndəki Filizçay polimetal yatağının texniki-iqtisadi əsaslandırılması, Şəmkirdə Qərb Sənaye Parkında yaradılması planlaşdırılan yaşıl enerji prinsiplərinə əsaslanan isti briketlənmiş dəmir istehsalı kompleksi və Söyüdlü (Zod) qızıl yatağının gələcək istismar planlarını nəzərdən keçiriblər. Durrani-Camal AİB-in kritik minerallar sahəsində yeni maliyyələşdirmə mexanizmləri tətbiq etdiyini və dayanıqlı inkişafı, məşğulluğu, regional iqtisadiyyatı dəstəkləyən layihələrlə əməkdaşlığa maraqlı olduğunu bildirib.
Görüşün sonunda texniki və maliyyə işçi qrupları səviyyəsində müntəzəm təmasları davam etdirmək, konkret layihələr üzrə əməkdaşlıq imkanlarını qiymətləndirmək barədə razılıq əldə olunub.
Əsas mənbə: APA