Vətənim Media xəbər verir ki, Türkiyənin Ədalət və İnkişaf Partiyasının sədr müavini Kürşad Zorlu Türk Dövlətləri Təşkilatının Ankara Zirvəsində ortaq əlifba məsələsinin də müzakirə ediləcəyini bildirib. O, türk dünyasını birləşdirən ortaq dəyərlərin və mədəni əlaqələrin Türkiyə-Azərbaycan qardaşlığı və əməkdaşlığının təməlini təşkil etdiyini vurğulayıb.
Zorlunun sözlərinə görə, iki ölkə arasındakı münasibətlər uzun və çətin proseslərdən keçərək formalaşıb. O, son dövrlərdə əlaqələri sarsıtmağa yönələn bəzi paylaşımları və təşəbbüsləri təəssüflə qarşıladıqlarını deyib. Zorlu qarşılıqlı tənqid və çatışmazlıqların dilə gətirilməsinin mümkün olduğunu, lakin “bir millət, iki dövlət” amalının hər şeydən üstün tutulmalı olduğunu bildirib. Onun qənaətinə görə, məsuliyyətli yanaşma ilə Türkiyə-Azərbaycan münasibətlərinə qarşı yönələn heç bir təxribat məqsədinə çata bilməz.
Əsas mənbə: APA