Vətənim Media xəbər verir ki, oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin 7-ci Zirvə Görüşü keçirilib. Prezident İlham Əliyev tədbirdə iştirak edən dövlət və hökumət başçılarını qarşılayıb, toplantını açıq elan edib və gündəliyi təqdim edib.
Zirvə görüşündə Laos Xalq Demokratik Respublikasının AQEM-ə üzv dövlət kimi qəbul olunması barədə qərar verilib. İlham Əliyev bu addımı platformanın Asiyada daha inklüziv dialoq məkanı kimi inkişafının göstəricisi adlandırıb və Laos Prezidenti Thonqlun Sisuliti təbrik edib. Azərbaycan Prezidenti çıxışında ölkəsinin sədrliyinə göstərilən dəstəyə görə üzv dövlətlərə minnətdarlığını bildirib, Azərbaycanın müstəqil xarici siyasətindən və regional əməkdaşlıqdan danışıb.
Çıxışının davamında İlham Əliyev Ermənistan-Azərbaycan münaqişəsinin tarixçəsinə, 2020-ci il müharibəsinə və 2023-cü ilin sentyabrında Azərbaycanın suverenliyini bərpa etməsinə toxunub. O, beynəlxalq təşkilatların münaqişə dövründəki mövqeyini tənqid edib və separatçıların liderlərinin Azərbaycanda məhkəmə qarşısına çıxarıldığını bildirib.
Əsas mənbə: APA