Vətənim Media xəbər verir ki, İslam Əməkdaşlıq Təşkilatının (İƏT) Baş katibi İsmayıl Ould Şeyx Əhməd üzv dövlətləri Məkkə əl-Mükərrəmə Konvensiyasını mümkün qədər tez ratifikasiya etməyə çağırıb. O, bu fikri Bakıda korrupsiyaya qarşı mübarizə aparan hüquq-mühafizə orqanları rəhbərlərinin üçüncü yüksək səviyyəli görüşündə səsləndirib.
Baş katibin sözlərinə görə, Konvensiyanın qüvvəyə minməsi üçün ən azı 19 üzv dövlətin ratifikasiyası tələb olunur. İndiyədək yeddi ratifikasiya əldə edilib. Sənəd 2021-ci ilin dekabrında Ciddədə keçirilən ilk Nazirlər Görüşündə təsdiqlənib, daha sonra İƏT Xarici İşlər Nazirləri Şurası tərəfindən yekun qəbul üçün zəmin yaranıb.
İsmayıl Ould Şeyx Əhməd BMT və digər beynəlxalq təşkilatlarla əməkdaşlığın vacibliyini vurğulayıb. O, üçüncü Nazirlər Görüşünə ev sahibliyinə görə Azərbaycana təşəkkür edib və toplantıda qəbul ediləcək qərarların korrupsiyaya qarşı birgə mübarizəni gücləndirəcəyinə ümid etdiyini bildirib. **APA**
Əsas mənbə: APA