Vətənim Media xəbər verir ki, Bakıda keçirilən Azərbaycan–Kamboca biznes forumunda iki ölkənin ticarət palataları arasında əməkdaşlığa dair Anlaşma Memorandumu mübadilə edilib. İqtisadiyyat Nazirliyinin təşkil etdiyi tədbirdə rəsmi şəxslərlə yanaşı, sənaye, kənd təsərrüfatı, tikinti, maliyyə, turizm, səhiyyə və informasiya texnologiyaları daxil olmaqla müxtəlif sahələrdən 100-ə yaxın iş adamı iştirak edib.
Kambocanın Baş naziri Hun Manet və Azərbaycanın iqtisadiyyat naziri Mikayıl Cabbarov çıxışlarında iqtisadi əlaqələrin inkişafı, ticarət və investisiya əməkdaşlığının genişləndirilməsi imkanlarına toxunublar. Kambocanın ticarət naziri Çam Nimul ölkəsinin biznes və investisiya imkanları barədə danışıb. Forumda iki ölkənin işgüzar mühitinə dair təqdimatlar keçirilib, iş adamları arasında B2B görüşlər təşkil olunub; tərəflər yeni əlaqələri və birgə layihələri müzakirə ediblər. Hun Manet Azərbaycanda rəsmi səfərdədir.
Əsas mənbə: APA