Vətənim Media xəbər verir ki, oktyabrın 14-də dünya fond bazarlarında fərqli dinamika qeydə alınıb: ABŞ və Asiya-Sakit okean regionunun əsas indeksləri geriləyib, Avropada isə artım olub. İtkilərin ən böyüyü Yaponiyada müşahidə edilib. “Nikkei 225” indeksi 5,27 faiz azalaraq 64 172,71 bəndə, “TOPIX” isə 2,74 faiz geriləyərək 3 984,36 bəndə düşüb. Honq-Konqun “Hang Seng” indeksi 1,26 faiz, Çinin “CSI 300” indeksi 2 faiz ucuzlaşıb.
ABŞ-da “Dow Jones” 0,09 faiz, “S&P 500” 1,11 faiz, “Nasdaq Composite” isə 1,88 faiz aşağı düşüb. Avropanın əsas indeksləri yüksəlib: “FTSE 100” 0,70 faiz, “CAC 40” 0,58 faiz, “Euro Stoxx 50” isə 0,38 faiz artıb. ABŞ-da sentyabr üzrə illik inflyasiyanın 3,7 faizə çataraq 3,6 faizlik proqnozu üstələməsi və süni intellekt sektorunda satışların güclənməsi bazarlara təzyiq göstərib. Faiz dərəcələrinin artırıla biləcəyi ehtimalı texnologiya şirkətlərinin səhmlərinə də təsir edib. Asiya bazarlarında yüksək neft qiymətləri və sektorun gəlirliliyinə dair narahatlıqlar da enişi dərinləşdirib; Avropada isə texnologiya şirkətlərinə tələbin artması indeksləri dəstəkləyib.
Əsas mənbə: APA