Vətənim Media xəbər verir ki, Azərbaycanda ümumi dəyəri 58,6 milyon ABŞ dolları olan enerji saxlama layihəsinin icrasına başlanılır. PAŞA Bank layihənin maliyyələşdirilməsi üçün 40 milyon dollar ayıracaq. Layihəni Türkiyənin YEO Teknoloji şirkəti həyata keçirəcək.
Layihə çərçivəsində 125 MVt gücündə, 250 MVt·saat tutumunda batareya əsaslı sistem qurulacaq. İşlər layihələndirmə, satınalma, tikinti və maliyyələşdirməni əhatə edən EPC-F modeli ilə, açar təslimi şərtləri əsasında aparılacaq. Batareyalarla yanaşı, yüksək gərginlikli yarımstansiya da tikiləcək.
Yeni sistem elektrik şəbəkəsinin dayanıqlığını artırmağa, istehsal və istehlak arasındakı tarazlığı qorumağa, eləcə də bərpa olunan mənbələrdən alınan enerjidən daha səmərəli istifadə etməyə yönəlib. Layihə barədə sazişin imzalanma mərasimində PAŞA Bankın İdarə Heyəti sədrinin müavini Bəhruz Nağıyev və YEO Teknolojinin İdarə Heyətinin sədri və baş icraçı direktoru Tolunay Yıldız iştirak ediblər.
Əsas mənbə: APA