Vətənim Media xəbər verir ki, Azərbaycan Mətbuat Şurasının şərhində jurnalistlərin IX qurultayında “Azərbaycan Jurnalistlərinin Etik Davranış Qaydaları”na edilən dəyişikliklərin süni intellektdən istifadə və şəxsiyyət hüquqlarının qorunması ilə bağlı olduğu bildirilir.
Qaydalara “Süni intellektdən etik istifadə” adlı yeni prinsip əlavə edilib. Burada media subyektlərinə süni intellektdən istifadə qaydalarını müəyyənləşdirmək, bu alətlərlə hazırlanan materialların məzmununu, faktlarını və mənbələrini yoxlamaq, auditoriyanı süni intellektin iştirakı barədə məlumatlandırmaq tövsiyə olunur. Sənəddə jurnalistin peşəkar mühakiməsinin və insan nəzarətinin süni intellektlə əvəzlənməməsi, müəlliflik hüquqlarına və şəxsi məlumatların məxfiliyinə riayət edilməsi də vurğulanır.
“Şərəf və ləyaqətin qorunması, şəxsi həyatın toxunulmazlığı” prinsipinə isə beş bənd əlavə olunub. Onlardan biri informasiya texnologiyalarından istifadə etməklə şəxsi həyat və fərdi məlumatların qanunla müəyyən edilmiş çərçivədən kənar açıqlanmamasına, digəri isə ictimai əhəmiyyəti olmayan şəxslər barədə doğru məlumatların icazəsiz paylaşılmasının yolverilməzliyinə aiddir. Şərhdə bu əlavələr Ali Məhkəmənin 2025-ci ilin dekabrında açıqladığı “Şəxsiyyət hüquqlarının müdafiəsi haqqında” Plenum qərarı ilə də əlaqələndirilir.
Əsas mənbə: www.presscouncil.az