Vətənim Media xəbər verir ki, Çexiya Televiziyasının məlumatına görə, Praqa, Brno, Liberets və Çeske-Budeyovitse şəhərlərində hökumətin ictimai televiziya və radionun maliyyələşmə qaydasını dəyişmək planına qarşı nümayişlər keçirilib. Ən böyük aksiya Praqanın Köhnə Şəhər meydanında baş tutub. Təşkilatçı “Demokratiya naminə milyon an” təşəbbüsünün bildirdiyinə görə, Praqada təxminən 10 min, Brnoda isə 4 min nəfər iştirak edib. Nümayişçilər Çexiya, Avropa İttifaqı və Ukrayna bayraqları qaldırıb, “İctimai mediadan əlinizi çəkin” şüarı yazılmış plakatlar tutublar.
Etirazlara parlamentin aşağı palatasının oktyabrın 24-də qanun layihəsini birinci oxunuşda qəbul etməsi səbəb olub. Layihə Çexiya Televiziyası və Çexiya Radiosunun vətəndaşların abunə haqları əvəzinə dövlət büdcəsindən maliyyələşdirilməsini nəzərdə tutur. Etirazçılar bu dəyişikliyin hökumətdən asılılığı artırıb redaksiya müstəqilliyini zəiflədə biləcəyini düşünür. Baş nazir Andrey Babiş isə ittihamları rədd edərək, medianın milliləşdirilməsinin planlaşdırılmadığını bildirib.
Parlamentdəki liberal müxalifət partiyaları, mədəniyyət xadimləri və Katolik kilsəsinin yerli nümayəndələri də layihəyə qarşı çıxıblar. Təşkilatçılar noyabrın 15-də Praqanın Letna meydanında daha böyük aksiya keçirməyi planlaşdırır. İctimai televiziya və radionun əməkdaşları isə noyabrın 3-də birgünlük tətil edəcəklərini açıqlayıblar.
Əsas mənbə: APA