Moskva vilayətində pilotsuz uçuş aparatlarının hücumu nəticəsində bir nəfər həlak olub, altı nəfər xəsarət alıb. Vilayət rəhbərliyi bildirir ki, hava hücumundan müdafiə və radioelektron mübarizə vasitələri ilə 16 bələdiyyə üzərində ümumilikdə 185 PUA məhv edilib və zərərsizləşdirilib.
Həlak olan şəxsin 20 yaşlı kişi olduğu, onun Solneçnoqorsk dairəsinin Radumlya qəsəbəsində öldüyü qeyd olunur. Yaralananlardan biri Pokrovskoye kəndində qəlpə xəsarətləri alaraq xəstəxanaya yerləşdirilib. İstra rayonunda Yadromino və Qorki yaşayış məntəqələrinin iki sakini hospitalizasiya olunub, onlardan birinə əməliyyat lazım gələcəyi bildirilir. Domodedovo dairəsinin Lyaxovo kəndində üç nəfər tibbi yardım üçün müraciət edib, müayinə sonrası xəstəxanaya yatmaqdan imtina ediblər.
Hücum nəticəsində yaşayış məntəqələrində maddi ziyan da qeydə alınıb. İstrada Safontyevo, Torlopovo, Qorki və Yadromino kəndlərində on ayrı-ayrı fərdi evə, təsərrüfat tikililərinə və iki avtomobilə ziyan dəyib. Volokolamsk dairəsinin Pokrovskoye kəndində evlərin fasadı və pəncərələrdə zədələnmə var. Domodedovo dairəsinin Lobanovo kəndində fərdi yaşayış evində yanğın baş verib, Barıbino qəsəbəsində isə daha bir ev dağılıb.
Xilasedicilər və aidiyyəti xidmətlər hadisə məntəqələrində çalışırlar. Rəsmi mənbələr vəziyyətlə bağlı məlumatları təqdim etməyə davam edir.
Əsas mənbə: APA