Vətənim Media xəbər verir ki, NASA tədqiqatçıları Ayın cənub qütbündəki kəskin temperatur dəyişikliklərinə davam gətirə biləcək bərk elektrolitli batareyalar üzərində işləyirlər. SPEARS adlanan layihə çərçivəsində hazırlanan enerji mənbələrinin gələcək Ay missiyalarında astronavtların təcili yardım dəstlərindən tutmuş roverlərə və elmi cihazlara qədər müxtəlif avadanlıqları işlətməsi nəzərdə tutulur.
NASA-nın Langley Mərkəzində aparılan sınaqlarda prototip batareyalar 80 dərəcə istiyədək, mənfi 60 dərəcəyədək normal işləyib; mənfi 80 dərəcədə isə göstəricilər bir qədər zəifləyib. Sınaqlar həmçinin batareyaların 100 dərəcədən mənfi 170 dərəcəyədək temperatur fərqinə məruz qaldıqdan sonra zədələnmədiyini göstərib. Tədqiqatçıların sözlərinə görə, belə soyuqda batareyalar işləməsə də, maye elektrolitli qurğulardan fərqli olaraq donub sıradan çıxmırlar; yenidən istifadədən əvvəl kiçik qızdırıcılarla əməliyyat temperaturuna gətirilə bilərlər.
Bərk elektrolit batareyanın kosmos vakuumunda buxarlanma riskini də aradan qaldırır. Texnologiya gələcəkdə Ayda uzunmüddətli fəaliyyətə dəstək verməklə yanaşı, avtomobillərdə, telefonlarda və dronlarda da tətbiq oluna bilər. 2026-cı ildə başladılan layihənin ilk mərhələsi texnologiyanın inkişafına yönəlib; NASA-nın Ames Mərkəzi isə uçuş sınaqları üçün avadanlıq hazırlayır.
Əsas mənbə: NASA