Vətənim Media xəbər verir ki, 2026-cı il oktyabrın 20-də “Qarabağ İtkin Ailələri” İctimai Birliyinin təşkilatçılığı ilə azərbaycanlı itkin ailələri Brüsseldə, Avropa Parlamentinin qarşısındakı Place du Luxembourg meydanında aksiya keçirib. APA-nın Qeyri-Hökumət Təşkilatlarına Dövlət Dəstəyi Agentliyinə istinadən yaydığı məlumata görə, aksiyada etiraz bəyanatı oxunub.
Bəyanatda Ermənistanın Azərbaycan ərazilərini işğalı zamanı 4 010 azərbaycanlının itkin düşdüyü, onların arasında 71 uşaq, 288 qadın və 319 ahıl şəxsin olduğu bildirilib. Mətndə Ermənistanın kütləvi məzarlıqların yerləri və itkinlərin sonrakı taleyi barədə məlumatları Azərbaycanla bölüşməsi tələb olunub. Bəyanata əsasən, azad edilmiş ərazilərdə 32 kütləvi məzarlıq aşkarlanıb, məhkəmə-genetik ekspertizaları ilə 328 nəfərin kimliyi müəyyənləşdirilib, 273 nəfərin nəşi ailələrinə təhvil verilib.
Aksiya zamanı itkin düşmüş şəxslərin fotoşəkilləri, geyimləri və məktub zərflərindən ibarət instalyasiya nümayiş etdirilib. Birliyin sədri Könül Behbudova beynəlxalq ictimaiyyəti itkin ailələri ilə həmrəy olmağa və Ermənistanı kütləvi məzarlıqlar barədə məlumat verməyə çağırıb. Təşkilat bildirib ki, ailə üzvlərindən xəbər alanadək Avropada aksiyalarını davam etdirəcək.
Əsas mənbə: APA