Vətənim Media xəbər verir ki, Azərbaycan Prezidenti İlham Əliyev oktyabrın 26-da Niderlandın xarici işlər naziri Tom Berendseni qəbul edib. APA-nın məlumatına görə, görüşdə iki ölkə arasında əlaqələrin inkişafı və əməkdaşlığın perspektivləri müzakirə olunub.
Tərəflər nəqliyyat, logistika, Bakı Beynəlxalq Dəniz Ticarət Limanı və kənd təsərrüfatı sahələrində əməkdaşlığın genişləndirilməsi imkanlarına toxunublar. İqtisadi-ticari əlaqələrin inkişafı və işgüzar nümayəndə heyətlərinin qarşılıqlı səfərlərinin təşkili də müzakirə edilib.
Tom Berendsen Yaxın Şərqdəki hadisələr zamanı Niderland vətəndaşlarının, o cümlədən Tehrandakı səfirin və səfirlik əməkdaşlarının Azərbaycan vasitəsilə təxliyəsinə göstərilən dəstəyə görə təşəkkür edib. O, Cənubi Qafqazda sülh və sabitliyin bərqərar olunmasında İlham Əliyevin rolunu yüksək qiymətləndirib. İlham Əliyev isə səfərin siyasi, diplomatik və iqtisadi əməkdaşlığı müzakirə etmək üçün yaxşı fürsət olduğunu bildirib.
Əsas mənbə: APA