Vətənim Media xəbər verir ki, APA-nın Tehran bürosunun məlumatına görə, Azərbaycanın İrandakı səfirliyinin təşkilatçılığı ilə 8 Noyabr – Zəfər Günü münasibətilə Tehrandakı “İstiqlal” hotelində tədbir keçirilib. Mərasimdə İran rəsmiləri, müxtəlif ölkələrin səfirləri, hərbi attaşelər, diplomatlar və media nümayəndələri iştirak ediblər.
Azərbaycanın İrandakı səfiri Əli Əlizadə çıxışında 44 günlük Vətən müharibəsini ölkə tarixində dönüş nöqtəsi adlandırıb. O, işğal dövründə mülki şəxslərin qətlə yetirilməsi, tarixi və dini abidələrin dağıdılması, eləcə də müharibə və insanlıq əleyhinə cinayətlər törədilməsi məsələlərinə toxunub.
Əlizadənin sözlərinə görə, son altı ildə azad edilmiş ərazilərin bərpasına dövlət büdcəsindən təxminən 17 milyard dollar ayrılıb, “Böyük Qayıdış” proqramı çərçivəsində isə həmin ərazilərdə 100 mindən çox insan yaşayır, işləyir və təhsil alır. Səfir Azərbaycan-İran sərhədinin 132 kilometrlik hissəsinin bərpasını və Ağbənd-Kəlalə körpüsünün açılışının yaxın aylara planlaşdırıldığını da qeyd edib. Zəfər Günü münasibətilə əvvəlki gün Təbrizdə də Azərbaycanın konsulluğu mərasim təşkil edib.
Əsas mənbə: APA