Hər bir məmur, hər bir dövlət qulluqçusu anlamalıdır ki, o, ilk növbədə, xalqının qulluqçusudur. Əsl məmur vəzifəsini vicdanla yerinə yetirməli, səlahiyyətlərindən sui-istifadə etməməli, dövlət və məmur adına xələl gətirməməlidirlər. Prezident İlham Əliyevin də “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransdakı çıxışı zamanı məmurlara ünvanladığı sərt xəbərdarlığının mahiyyətini bu təşkil edir.
Bunu açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov bildirib.
Millət vəkilinin fikrincə, ümumiyyətlə, hər bir məmur cəmiyyətdə digərlərinə nümunə olmalıdır:
“Dövlət başçısı konfransda dəyərli bir fikir səsləndirdi ki, Azərbaycanda aparılan siyasətin başlıca məqsədi Azərbaycan vətəndaşlarının maraqlarının ifadə olunması, onların sosial rifah halının yüksəldilməsidir. Məhz bu siyasətin sayəsində Azərbaycan xalqında öz dövlətinin başçısına böyük etimad yaranıb. Cənab prezidentin də qeyd etdiyi kimi, dövlətin əldə etdiyi uğurlarının arxasında Azərbaycan vətəndaşlarının dəstəyi dayanır. Ona görə də cənab prezidentin tapşırıqlarını yerinə yetirmək hər bir məmurun vəzifə borcudur. Onlar öz davranışı, fəaliyyəti ilə cəmiyyətdə digərlərinə nümunə olmalıdır”.