Dərd gəmirir söz ömrümün çoxunu,
Qəm kotanı şırım açır könlümdə.
Zaman atır hər gün acı oxunu,
Adiləşib indi vaxtsız ölüm də…
Toxum kimi əkilirəm vətəndə,
Qala kimi tikilirəm vətəndə,
Film kimi çəkilirəm vətəndə,
Baş roldadı zalımlar hər bölümdə…
Dilim gəlmir qarğış edəm fələyə,
Fələk oğlu fələk düşüb tələyə…
Zaman uyub kələkbaza, kələyə…
Haqqın şamı söndürülüb külümdə…
Ağrım-acım vallah mənə bəs idi,
Bu dünyadan küsgün düşmüş kəs idim,
Yaşamaqçün “imtahandan” kəsildim.
İşsız keçdi günüm,ayım, ilim də!
Yaradanın axı mənlə nə qəsdi?
Yollarımı qatı duman-çən kəsdi,
Taleyimə hicran yeli tez əsdi…
Erkən soldu bağ-bağçamda gülüm də…
Tənhalığım kədər asıb gözümdən,
İncik düşdüm, taleyimdən-özümdən,
Hərdən küsür dost- doğmalar sözümdən,
Acı sözlər bitir mənim dilmdə…
Pisə necə yaxşı deyim yalandan,
Gen gəzirəm yalanla can alandan,
Azərnuram Səmayəmsiz qalandan,
Qərib kimi dolaşıram elimdə…
AzərNUR