Bu dünyayla o dünyanın rəmzi qapısı sayılan qəbirlər…
Adətən insanın keçdiyi həyat yolu, adları, soyadları əks olunur bu qapılara… Sanki tıqqıldatsan indicə açacaqlar…
Əksər insanlar baş daşlarına həkk olunacaq şəkillərini, formasını vəsiyyət edirlər. Bəzən də onların bu dünyada qoyduqları izin bir zərrəsini baş daşında yaşadır memarlar.
Turkustan.info A24.Az-a istinadən qeyri-adi qəbirüstü abidləri olan şəxsiyyətlər haqqında fotoreportaj təqdim edir.
Ölüm haqqında bir çoxumuzun nabələd qaldığı mətləblərə vaqif olan şəxsiyyətlə başlayaq – Vaqif Səmədoğlu…
“Ölüm bir gün də tək qoymur məni”, “Həyat ayrılıq imiş insanla ölüm arasında”, “Ağla, mən ölüm, ağla”…
“Məzarıma nə başdaşı qoyun, nə heykəl. Bir cüt ayaqqabı qoyun, ayağıyalın geyib getsin…” yazmışdı… Elə də ediblər; bir cüt ayaqqabı, misralarda vəsiyyət, bir də möhtəşəm müraciət: MƏN BURDAYAM, İLAHİ!
- Küləyə də vərəq verəcək qədər səxavətli, eyni zamanda vərəqi əldə qılınc kimi tutmağı bacaran türk! Xəlil Rza Ulutürk!
Notlara söykənən ömür… Süleyman Ələsgərov…
Sadəcə Bəy!
Döş daşında 8 türkdilli dövlətə işarə olan 8 guşəli ulduz, içində 8 buta, çölündə E L Ç İ B Ə Y…
- Yəqin ki, şərhə ehtiyac yoxdur…
- Bu get-gəllər bazarına dəvədi dünya,
Bu ömür-gün naxışına həvədi dünya.
Əbədiyə qəh-qəh çəkər əbədi dünya,
Dünya sənin, Dünya mənim, Dünya heç kimin…
Əksər qəbirüstü abidələrin üzərində “Burada filankəs uyuyur” yazılır. Məmməd Arazın döş daşında isə “Bu daşın altında Məmməd Araz yaşayır” yazılıb.
Gülüm, bir də görüşünə yubansam,
Adımı tut, harda dağlar dumansa.
Gözünü sıx, hansı daşda su yansa,
O daş altda Məmməd Araz yaşayır…
Xalq artisti Nəsibə Zeynalova… Pərdə enmir…
Azərbaycan SSRİ-nin siyasi xadimi Nazim Hacıyev…
1961-ci ilin yanvarında məqsədli şəkildə, yanlış edilən cərrahi əməliyyat üzündən ağır xəstələnir və 1962-ci il iyulun 30-da vəfat edir. Nazim Hacıyevin baş daşının yerində hər bahar yaşaran 3 qızılgül kolu var.
Tanınmış bəstəkar Tofiq Quliyev və sevimli aləti…
1941-1945 kimi keçilməz səddi yardıqdan sonra tapdadığı “ilan” tərəfindən sancılan akademik Ziya Bünyadov…
Ağ-qara məzar daşından bizə şirin yuxu diləyən Yusif Səmədoğlu…
Eyni yolun yolçuları, iki Müslüm Moqamayev…
Azərbaycan ədəbiyyatında kişi obrazlarının misilsiz müəllifi İsmayıl Şıxlı və qələmini simvolizə edən qılınc…
- I Fəxri xiyabanda çay tikanlarının bitdiyi bu boşluqda isə yəqin ki, bu gün fəxrimiz olan şəxsiyyətlərin abidələri görünəcək…
