Oktyabrın 21-də Gürcüstanda keçiriləcək yerli idarəetmə seçkiləri üçün bülletenlər milli azlıqların dillərində də çap olunacaq.
Gürcüstan Mərkəzi Seçki Komissiyasının (MSK) mətbuat katibi Ana Mikeladze APA-nın yerli bürosuna bildirib ki, seçki bülletenləri gürcü-Azərbaycan və gürcü-erməni dillərində çap olunaraq milli azlıqların sıx yaşadıqları bölgələrə göndəriləcək.
A. Mikeladze deyib ki, MSK bəzi seçki məntəqələri üçün 3 dildə – gürcü, Azərbaycan və erməni dillərində bülletenlər çap etdirəcək: “Seçki bülletenlərinin çap olunması prosesinə hələ başlanılmayıb. Seçicilərin yekun siyahısı əldə olunandan sonra prosesə start veriləcək”.
Qeyd edək ki, Gürcüstanda 3,4 milyon nəfərdən çox seçici var.