“Rusiya prezidenti Vladimir Putin Türkiyəyə gedir. Türkiyə prezidenti Rəcəb Təyyub Ərdoğan son aylarda Rusiyaya xeyli səfər edib, rusiyalı həmkarıyla gah Moskvada, gah da Soçidə görüşüb. Növbə Putinindir, indi onu Ankarada gözləyirlər”.
Bu sözləri politoloq Elxan Şahinoğlu deyib.
Politoloq qeyd edib ki, liderlər həmişəki kimi iki ölkə arasında həyata keçirilən böyük enerji layihələrindən danışacaqlar, Suriyada İŞİD terroruna son qoyulması da gündəm mövzusu olacaq:
“ABŞ prezidenti Donald Tramp Ərdoğan – Putin görüşünə yeni mövzu da verib, Türkiyə və Rusiya prezidentləri Vaşinqtonun Qüdsü İsrailin paytaxt kimi tanıması məsələsinə də toxunacaqlar. Putin bu məsələdə Ərdoğan qədər sərt mövqedə deyil, ona görə də onun Ankarada bu məsələ ilə bağlı verəcəyi açıqlama bir qədər ehtiyatlı olacaq. Çünki Putin Ərdoğandan fərqli olaraq İsraillə münasibətləri korlamaq istəmir”.
Dağlıq Qarabağ mövzusuna gəldikdə isə E.Şahinoğlu bildirib ki, Ərdoğanın bizim mövzunu israrla Putinlə geniş müzakirə edəcəyi proqnozlaşdırmır: “Ərdoğan iki dəfə təşəbbüs göstərdi, Putin Qarabağı türkiyəli həmkarıyla müzakirə etməyə həvəs göstərmədi”.
/Cebhe.info/