Vətənim Media xəbər verir ki, “Bank Avrasiya” ASC bu ilin üçüncü rübündə 3 milyon 996 min manat xalis mənfəət əldə edib. Məbləğ ötən ilin eyni dövrü ilə müqayisədə 30 faiz azdır: həmin vaxt bankın xalis mənfəəti 5 milyon 705 min manat olub. Hesabat dövründə gəlirlər illik müqayisədə 12,6 faiz artaraq 16,2 milyon manata, xərclər isə 27,05 faiz yüksələrək 9,1 milyon manata çatıb. Müştəri depozitlərinə hesablanan faiz xərcləri 1,5 milyon manat təşkil edib və bir il əvvəllə müqayisədə 4,2 dəfə artıb.
Oktyabrın 1-nə bankın aktivləri ötən ilin sonu ilə müqayisədə 11,5 faiz artaraq 239,2 milyon manata, öhdəlikləri isə 16,3 faiz yüksələrək 144,8 milyon manata çatıb. Müştərilərə verilən kreditlərin həcmi 1,7 faiz artımla 139,5 milyon manat olub. Biznes kreditləri 7,8 faiz azalaraq 51,2 milyon manata düşüb; vaxtı keçmiş kreditlər 12,06 milyon manat təşkil edib və bunun 6,8 milyon manatı kənd təsərrüfatı kreditlərinin payına düşüb. Depozit portfeli isə ötən ilin sonundan 25,5 faiz artaraq 89,7 milyon manata yüksəlib. Bunun 80,4 milyon manatı fiziki, 9,3 milyon manatı hüquqi şəxslərin əmanətləridir; hüquqi şəxslərin depozitləri 7,7 faiz azalıb.
Əsas mənbə: APA