Vətənim Media xəbər verir ki, Ukrayna yaxın vaxtlarda İsveç istehsalı olan ilk “Gripen” qırıcılarını qəbul etməlidir. Prezident Volodimir Zelenski bu barədə İsveçin Baş naziri Ulf Kristersson ilə Brüsseldə keçirdiyi görüşdən sonra açıqlama verib.
Tərəflər Ukraynanın davamlı hücumlardan müdafiə ehtiyaclarını, o cümlədən hava hücumundan müdafiənin gücləndirilməsini müzakirə ediblər. Zelenski bildirib ki, “Gripen”lər Ukraynanın F-16 təyyarələrini tamamlayacaq və reaktiv mühərrikli “Şahed” dronlarına qarşı mübarizədə faydalı ola bilər. Kristerssonun sözlərinə görə, təyyarələrin istifadəyə hazırlanması davam edir, ukraynalı pilotlar təlim keçir və inteqrasiya ilə bağlı çətinliklər aradan qaldırılıb.
İsveçin baş naziri, həmçinin, Ukraynanın 2026-cı ilin sonu və 2027-ci ildə ciddi maliyyə dəstəyinə ehtiyac duyacağını qeyd edib. O, Rusiyaya təzyiqin artırılmasının və Ukraynaya uzunmüddətli dəstəyin gücləndirilməsinin vacibliyini vurğulayıb.
Əsas mənbə: APA