Vətənim Media xəbər verir ki, APA-nın “Bloomberg”ə istinadən yaydığı məlumata görə, Ukrayna Prezidenti Volodimir Zelenski ABŞ Prezidenti Donald Trampı Kiyevi Rusiya qarşısında kapitulyasiyaya məcbur etməyə çalışmaqda ittiham edib. Zelenski ABŞ administrasiyasının Ukraynadan Rusiyanın neft emalı zavodlarına hücumları dayandırmağı tələb etdiyini, lakin bunun qarşılığında Ukraynanın hava hücumundan müdafiəsi üçün əlavə dəstək təklif etmədiyini bildirib.
Zelenskinin sözlərinə görə, o, Rusiyanın dizel yanacağı istehsalına zərbələri dayandırmaq müqabilində Ukraynaya obyektlərini qorumaq üçün “Patriot” raketləri verilməsini təklif edib. ABŞ tərəfinin isə hücumları dayandırmağı istədiyini və əks halda Ukraynaya dəstəyi kəsə biləcəyini söylədiyini qeyd edib. Zelenski Vaşinqtonun bəzi addımlarının Kiyevi kapitulyasiyaya məcbur etmək təsiri bağışladığını desə də, ABŞ-ın məqsədinin bu olduğuna inanmaq istəmədiyini vurğulayıb.
Ukrayna lideri ABŞ-la münasibətlərin aralıq seçkilərindən sonra yaxşılaşacağına ümid etdiyini bildirib. O, Rusiyanın ötən həftə ərzində Ukraynaya təxminən 2700 dron, 1700 aviasiya bombası və 66 raket buraxdığını, raketlərin əksəriyyətinin ballistik olduğunu deyib. Zelenski ABŞ-ın hərbi dəstəyinin azalmasından və “Patriot” raketlərinin tədarükünün gecikməsindən də narahatlığını ifadə edib.
Əsas mənbə: APA