Vətənim Media xəbər verir ki, APA-nın məlumatına görə, azərbaycanlı itkin düşmüş şəxslərin ailə üzvləri ilk dəfə Avropa İttifaqının Xarici Fəaliyyət Xidmətində qəbul ediliblər. Oktyabrın 21-də Brüsseldə keçirilən görüşdə “Qarabağ İtkin Ailələri” İctimai Birliyinin nümayəndələri Aİ-nin xüsusi nümayəndəsinin siyasi məsələlər üzrə müşaviri Okke Bouwman və Azərbaycanla əlaqələr üzrə koordinatoru Marco Cardinali ilə görüşüblər.
İctimai Birliyin sədri Könül Behbudova görüşdə Ermənistanın münaqişədən sonrakı dövrdə itkinlərin taleyi barədə məlumat vermədiyini bildirib. O, oktyabrın 20-də Avropa Parlamentinin qarşısındakı Lüksemburq meydanında keçirilən aksiyanı və qəbul olunan bəyanatı xatırladıb, Ermənistanın kütləvi məzarlıqların yerləri barədə məlumatları Azərbaycanla bölüşməli olduğunu vurğulayıb. Behbudovanın sözlərinə görə, işğaldan azad edilmiş ərazilərdə indiyədək 32 kütləvi məzarlıq aşkarlanıb.
Görüşdə oktyabrın 21-də Brüsselin Şuman meydanında keçirilən növbəti aksiya da müzakirə olunub. Birliyin nümayəndələri yaxınlarının taleyi aydınlaşana qədər etirazları davam etdirəcəklərini bildiriblər.
Əsas mənbə: APA