Vətənim Media xəbər verir ki, “Həzi Aslanov” stansiyasının dalanında əsaslı təmir və yenidənqurma işləri yekunlaşıb. Bakı Metropoliteninin mətbuat xidmətinin rəhbəri Bəxtiyar Məmmədovun APA-ya verdiyi açıqlamaya görə, növbəti mərhələdə infrastruktur sınaqdan keçiriləcək. İşlərin yaxın günlərdə tamamlanmasından sonra qatarların “İçərişəhər”–“Həzi Aslanov” istiqamətində hərəkəti müvafiq elan əsasında bərpa olunacaq.
Məmmədov bildirib ki, yenilənmiş dalan ehtiyat qatarların xəttə daha operativ buraxılmasına və nasaz qatarların qısa müddətdə çıxarılmasına imkan verəcək. Pik saatlarda qatarlar iki dəqiqəlik, digər vaxtlarda isə iki dəqiqə 30 saniyədən çox olmayan intervalla hərəkət edəcək.
Dalanın dörd yoldan ibarət infrastrukturu əvvəlkindən 20 metr uzadılıb. Bu yenilik və “İçərişəhər” stansiyasının arxasında inşa olunan dönmə kamerası gələcəkdə “Qırmızı xətt”də altı vaqonlu qatarların hərəkətinə şərait yaratmalıdır. Bunun üçün qatar sistemləri və stansiyaların infrastrukturu da uyğunlaşdırılacaq.
Əsas mənbə: APA