Vətənim Media xəbər verir ki, oktyabrın 8-də Türkmənistanın Türkmənbaşı şəhərində Azərbaycan və Mərkəzi Asiya dövlət başçılarının 8-ci Məşvərət görüşü keçirilib. Azərbaycan Prezidenti İlham Əliyev toplantıda iştirak edib və çıxışında regional əməkdaşlığın genişləndirilməsinə dair məsələlərə toxunub.
Prezident Azərbaycanın Mərkəzi Asiya ölkələri ilə ticarət dövriyyəsinin ötən il 50 faizdən çox artdığını, ölkədə həmin dövlətlərin kapitalı ilə 400-dən artıq şirkətin fəaliyyət göstərdiyini bildirib. O, birgə investisiyaların, istehsal layihələrinin və sənaye əməkdaşlığının artırılmasının vacibliyini vurğulayıb. Çıxışda Xəzər üzərindən nəqliyyat əlaqələri, Orta Dəhliz, rəqəmsal infrastruktur və enerji əməkdaşlığı da qeyd olunub. İlham Əliyevin sözlərinə görə, Orta Dəhliz üzrə yükdaşımalar ötən il 10 faizdən çox, cari ilin ilk səkkiz ayında isə təxminən 20 faiz artıb. Türkmənistan Prezidenti Sərdar Berdiməhəmmədov Azərbaycanın regional formatda iştirakını və çoxtərəfli əməkdaşlığı müsbət qiymətləndirib.
Əsas mənbə: APA