Vətənim Media xəbər verir ki, Bakı Təşəbbüs Qrupu Fransada gənclərin etirazları zamanı saxlanılma və xəsarətalma halları, eləcə də xüsusi vasitələrin tətbiqi ilə bağlı narahatlığını açıqlayıb. Qrupun bəyanatında bildirilib ki, Kreteydə başlayan və ölkə üzrə yayılan hərəkat təhsildə müəllim çatışmazlığı, məktəb binalarının vəziyyəti, dərs yükü və ali məktəblərə qəbul sistemi ilə bağlı narazılıqlardan qaynaqlanıb. Sonradan aksiyalara tələbələr, müəllimlər, valideynlər və həmkarlar ittifaqları da qoşulub.
Bəyanatda Fransa daxili işlər nazirinin oktyabrın 8-nə olan məlumata əsasən, 6 600-dən çox şəxsin saxlanıldığını, 215 şagird və 89 təhsil işçisinin xəsarət aldığını açıqladığı qeyd olunub. Lens şəhərində 15 yaşlı şagirdin səs qumbarasının partlaması nəticəsində əlini itirməsi xüsusi narahatlıq doğuran hal kimi göstərilib. Bakı Təşəbbüs Qrupu Fransa hakimiyyətini güc tətbiqində zərurilik və mütənasiblik prinsiplərinə əməl etməyə, xəsarətlərlə nəticələnən hadisələri araşdırmağa, azyaşlıların dinc etiraz və ifadə hüquqlarını qorumağa, həmçinin təhsil ictimaiyyəti ilə dialoq aparmağa çağırıb.
Əsas mənbə: APA