Vətənim Media xəbər verir ki, oktyabrın 9-da Türkmənbaşı şəhərində keçirilən Xəzər Ekoloji Sammitinin geniş tərkibdə iclasında Azərbaycan Prezidenti İlham Əliyev Xəzər dənizinin səviyyəsinin enməsinin sürətləndiyini bildirib. Onun sözlərinə görə, dənizin səthi artıq 20 min kvadratkilometrdən çox kiçilib, hazırkı tendensiya davam edərsə, nəticələr fəlakətli ola bilər.
Prezident dayazlaşmanın sahil ərazilərinə, iqtisadiyyata, nəqliyyata və limanların fəaliyyətinə təsir etdiyini, Azərbaycan hissəsində dənizin çəkilməsi nəticəsində təxminən 30 min hektar quru sahənin yarandığını qeyd edib. O, problemin səbəblərinin elmi araşdırılması və dəniz səviyyəsinin enməsinə təsir edən amillərin müəyyənləşdirilməsi üçün Xəzəryanı ölkələrin daimi əməkdaşlıq və nəzarət mexanizmi yaratmasını təklif edib. Əliyev 2018-ci ildə imzalanmış Xəzər dənizinin hüquqi statusu haqqında Konvensiyanı beş ölkənin uzunmüddətli birgə işinin nəticəsi kimi dəyərləndirib.
İclasda çıxış edən Türkmənistan Prezidenti Sərdar Berdiməhəmmədov sammitin Xəzərin ekoloji gündəliyi üzrə əməkdaşlığa töhfəsini vurğulayıb və tərəfdaşlarla bu istiqamətdə birgə işi davam etdirməyə hazır olduqlarını bildirib.
Əsas mənbə: APA