Vətənim Media xəbər verir ki, Fövqəladə Hallar Nazirliyinin Dövlət Yanğından Mühafizə Xidmətinin təşkilatçılığı ilə Sumqayıt, Bakı və Astaradakı yanğınsöndürmə hissə və bölmələrində uşaqlar və məktəblilər üçün açıq qapı günləri təşkil olunub. Tədbirlər 22 nömrəli Yanğından Mühafizə Hissəsində, 1 nömrəli Xüsusi Təyinatlı hissədə, Səbail, Nərimanov, Suraxanı və Astara rayon yanğından mühafizə hissələrində, eləcə də Sabunçu və Yasamal rayonlarının 23 və 31 nömrəli bölmələrində keçirilib.
Tədbirlərdə bir sıra uşaq bağçalarının azyaşlıları və tərbiyəçiləri, həmçinin Astara şəhər 1 saylı tam orta məktəbinin şagirdləri və müəllimləri iştirak ediblər. Onlara yanğın hissələrinin işi, yanğınsöndürənlərin gündəlik fəaliyyəti və ilkin yanğınsöndürmə vasitələrindən istifadə qaydaları barədə məlumat verilib, əməkdaşların məşqləri nümayiş etdirilib. Uşaqlar yanğınsöndürmə və qəza-xilasetmə texnikası ilə tanış olub, fövqəladə hallarda təhlükəsiz davranış qaydalarını öyrəniblər; sualları cavablandırılıb. Tədbirlərin məqsədi uşaqlarda təhlükəsizlik mədəniyyəti və ilkin yanğın təhlükəsizliyi biliklərini formalaşdırmaq olub.
Əsas mənbə: APA