Vətənim Media xəbər verir ki, 2026-cı ildə Azərbaycanda 18 yerli müəssisənin rəqəmsal transformasiyası üzrə fərdi yol xəritələri hazırlanacaq. İqtisadiyyat nazirinin birinci müavini Elnur Əliyev bu barədə Bakıda keçirilən III Milli Rəqabət Forumunda danışıb. İşlər Dördüncü Sənaye İnqilabının Təhlili və Koordinasiya Mərkəzinin proqramı çərçivəsində görülür.
Əliyevin sözlərinə görə, 2030-cu ilədək dövlət maliyyələşməsi ilə əlavə müəssisələrin rəqəmsal hazırlığının qiymətləndirilməsi, eləcə də rəqəmsal və yaşıl transformasiya planlarının hazırlanması nəzərdə tutulur. O, SOCAR-ın Karbamid Zavodunun Dünya İqtisadi Forumunun “Global Lighthouse Network” şəbəkəsinə daxil edilməsini sənaye müəssisələrinin texnoloji inkişaf imkanlarına nümunə göstərib və bu təcrübənin daha geniş yayılmasının vacibliyini vurğulayıb.
Nazir müavini forumda dövlət-özəl tərəfdaşlığı çərçivəsində 2026–2027-ci illər üçün 9 layihənin təsdiqləndiyini də bildirib. Onun açıqlamasına əsasən, II Azərbaycan Beynəlxalq İnvestisiya Forumunda 10,8 milyard dollar dəyərində 23 investisiya sənədi imzalanıb; Bakı Enerji Həftəsində elan olunan layihələrlə birlikdə ümumi məbləğ 16,7 milyard dollara çatıb.
Əsas mənbə: APA