Vətənim Media xəbər verir ki, Azərbaycandan qeyri-neft-qaz məhsulları ixrac edən sahibkarların daşınma xərclərinin 70 faizədək hissəsinin dövlət tərəfindən qarşılanması nəzərdə tutulur. İqtisadiyyat nazirinin birinci müavini Elnur Əliyev bu barədə Bakıda keçirilən III Milli Rəqabət Forumunda danışıb. Kiçik və orta ixracatçıların gömrük rəsmiləşdirilməsi üzrə ödənişlərinin bir hissəsinin də kompensasiya edilməsi planlaşdırılır.
Əliyevin sözlərinə görə, Naxçıvanda istehsal olunan malların ölkənin digər ərazilərinə daşınma xərcinin 70 faizi ödənilir. Bakı və Abşerondan kənarda kredit faizlərinin yarısının subsidiyalaşdırılması, kreditin əsas məbləği üzrə isə işğaldan azad edilmiş ərazilərdə 90 faizədək, digər regionlarda 50 faizədək dövlət zəmanəti verilməsi mexanizmləri tətbiq olunur. 2027-ci ildən sənaye və kənd təsərrüfatı obyektlərinin elektrik şəbəkəsinə qoşulma haqqının yarısının dövlət tərəfindən ödənilməsi nəzərdə tutulur. İnvestisiya təşviqi mexanizmi 2029-cu ilədək uzadılıb; sentyabrın 1-dək 528 sahibkarlıq subyektinə 633 sənəd verilib. Layihələr 9,13 milyard manat investisiya və təxminən 47 min iş yeri nəzərdə tutur.
Əsas mənbə: APA