Vətənim Media xəbər verir ki, Qırğızıstan Prezidenti Sadır Japarov Azərbaycanın 2028-ci ilə qədər Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyini dəstəklədiyini bildirib. O, Azərbaycanın təşkilatın güclənməsinə böyük töhfə verdiyini vurğulayıb.
AQEM-in 7-ci Zirvə Görüşünün plenar iclasında çıxış edən Japarov təşkilatın açıq dialoq və etimadın artırılması üçün əhəmiyyətini qeyd edib. Onun sözlərinə görə, prioritetlər sırasında rəqəmsallaşmanın inkişafı, investisiyaların cəlb edilməsi, sənaye əməkdaşlığının, nəqliyyat və iqtisadi əlaqələrin, eləcə də enerji sahəsində tərəfdaşlığın genişləndirilməsi yer alır. Turizmin inkişafı, iqlim dəyişikliyi və ətraf mühitin mühafizəsi üzrə birgə fəaliyyətin də vacib olduğu bildirilib.
Japarov Yaxın Şərqdə münaqişənin genişlənməsini yolverilməz saydı, Əfqanıstanın təcrid edilmək əvəzinə beynəlxalq dəstəyə ehtiyac duyduğunu söylədi. O, Qırğızıstanın Fələstin xalqını dəstəklədiyini də qeyd etdi.
Əsas mənbə: APA