Vətənim Media xəbər verir ki, Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Belçikaya işgüzar səfəri çərçivəsində Avropa İttifaqının yüksək vəzifəli rəsmiləri ilə görüşüb. APA-nın məlumatına görə, danışıqlarda ikitərəfli münasibətlərin hazırkı vəziyyəti və inkişaf perspektivləri, Tərəfdaşlıq Prioritetləri və Azərbaycanla Aİ arasında yeni sazişin razılaşdırılması müzakirə edilib.
Tərəflər enerji təhlükəsizliyi, regional nəqliyyat əlaqələri və Naxçıvan dəmir yolu xəttinin bərpası layihəsi üzrə Aİ-nin hazırladığı texniki-iqtisadi əsaslandırma barədə fikir mübadiləsi aparıblar. Azərbaycan və Ermənistan arasında sülh prosesi, mina və partlamamış hərbi sursatların təmizlənməsi üçün nəzərdə tutulan Aİ layihələri, eləcə də regiondakı təhlükəsizlik çağırışları da müzakirə olunub.
Görüşlərdə Azərbaycan–Aİ münasibətlərinin strateji əhəmiyyəti vurğulanıb. Tərəflər 2026-cı ildə əməkdaşlığın yüksək dinamika ilə davam etməsini məmnunluqla qeyd edib, ikitərəfli gündəlikdəki məsələlər üzrə praktiki əməkdaşlığı gücləndirməyin vacibliyini bildiriblər.
Əsas mənbə: APA