Vətənim Media xəbər verir ki, oktyabrın 26-da Azərbaycanın xarici işlər nazirinin müavini Elnur Məmmədov ölkəmizdə səfərdə olan UNESCO Baş direktorunun müavini Asa Regnerlə görüşüb. APA-nın Xarici İşlər Nazirliyinin mətbuat xidmətinə istinadən verdiyi məlumata görə, tərəflər əməkdaşlığın hazırkı vəziyyətini və inkişaf perspektivlərini müzakirə ediblər.
Görüşdə mədəniyyətlərarası dialoq, təhsil, elm, süni intellekt, mədəni irs və dayanıqlı turizm, eləcə də Afrika ölkələrinə və kiçik ada dövlətlərinə dəstək məsələləri nəzərdən keçirilib. 2013-cü ildə imzalanan Çərçivə Sazişinin və Azərbaycan-UNESCO Etimad Fondunun əməkdaşlığın inkişafındakı rolu qeyd olunub. Məmmədov Azərbaycanın 2025–2028-ci illər üçün süni intellekt strategiyası və Rəqəmsal İnkişaf Şurası barədə məlumat verib. Regner isə VII Ümumdünya Mədəniyyətlərarası Dialoq Forumunun təşkilinə və Azərbaycanın Afrika ölkələrinə, gender bərabərliyinə, qızların təhsilinə və kiçik ada dövlətlərinə dəstəyinə görə təşəkkür edib. Görüşdə digər qarşılıqlı maraq doğuran məsələlər də müzakirə olunub.
Əsas mənbə: APA