Vətənim Media xəbər verir ki, APA-nın məlumatına görə, Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev “Maraqların toqquşması haqqında” qanun layihəsinin müzakirəsində sənədin əsas prinsiplərini açıqlayıb. O bildirib ki, layihə dövlət idarəçiliyində şəffaflığın artırılması, korrupsiya risklərinin azaldılması və vəzifəli şəxslərin məsuliyyətinin gücləndirilməsinə xidmət etməlidir.
Nağıyevin sözlərinə görə, qanunda maraqların toqquşmasının əhatə dairəsi və anlayışlar dəqiq müəyyənləşdirilməli, şəxsi maraqların bəyan edilməsi, məlumatların yoxlanılması və məxfiliyinin qorunması qaydaları göstərilməlidir. Belə vəziyyətlərdə qərarların obyektivliyini və ictimai mənafeyi qoruyacaq həll yolları, eləcə də nəzarət mexanizmləri nəzərdə tutulmalıdır.
Komitə sədri məsuliyyət tədbirlərinin aydın və proporsional olmasının, qəsdən gizlədilən hallarla vaxtında açıqlanan vəziyyətlərin fərqləndirilməsinin vacibliyini vurğulayıb. O qeyd edib ki, maraqların toqquşması özlüyündə cinayət sayılmır, lakin düzgün idarə edilmədikdə korrupsiya üçün şərait yarada bilər.
Əsas mənbə: APA