Vətənim Media xəbər verir ki, Baş prokuror Kamran Əliyev Bakıda Səudiyyə Ərəbistanının Nəzarət və Korrupsiyaya Qarşı Mübarizə Orqanının (Nazaha) prezidenti Mazin bin İbrahim əl-Kahmusa “Prokurorluq orqanları ilə səmərəli əməkdaşlığa görə” medalını təqdim edib. Baş Prokurorluğun Mətbuat xidmətinin APA-ya verdiyi məlumata görə, təltif əməkdaşlığın inkişafına və iki ölkənin müvafiq qurumları arasında əlaqələrin möhkəmləndirilməsinə verdiyi töhfəyə görə həyata keçirilib.
Medalın təqdimatı Bakıdakı görüş çərçivəsində baş tutub. Tərəflər 2023-cü ilin noyabrında imzalanmış əməkdaşlıq memorandumunun icrasını, beynəlxalq platformalarda birgə işi, korrupsiya cinayətləri üzrə məlumat mübadiləsini və qarşılıqlı hüquqi yardım imkanlarını müzakirə ediblər. Görüşdə Azərbaycanın və Səudiyyə Ərəbistanının səfirləri də iştirak ediblər.
Əsas mənbə: APA