Vətənim Media xəbər verir ki, oktyabrın 28-də Bakıda İslam Əməkdaşlıq Təşkilatına (İƏT) üzv dövlətlərin korrupsiyaya qarşı mübarizə aparan hüquq-mühafizə orqanlarının üçüncü yüksək səviyyəli görüşü keçirilib. Tədbirdə 46 üzv və müşahidəçi ölkədən, eləcə də 8 beynəlxalq təşkilatdan 250-dən çox nümayəndə iştirak edib. Onların arasında 40-dan çox yüksəkvəzifəli şəxs olub.
Görüşdə korrupsiya yolu ilə əldə edilmiş aktivlərin aşkar olunması və qaytarılması, antikorrupsiya fəaliyyətində müasir texnologiyaların tətbiqi və dövlətlərarası əməkdaşlıq müzakirə edilib. Seçkilərin nəticəsinə əsasən, Azərbaycan görüşün Bürosuna iki il müddətinə yekdilliklə sədr seçilib; Büro üzvləri isə İraq, Fələstin və Burkina Faso olub.
Tədbir çərçivəsində Azərbaycan “İƏT üzv dövlətlərinin korrupsiyaya qarşı mübarizə üzrə hüquq-mühafizə əməkdaşlığı haqqında Məkkə əl-Mükərrəmə Konvensiyası”nı imzalayıb. Sənədi Azərbaycan adından Baş prokuror Kamran Əliyev imzalayıb.
Əsas mənbə: APA