Bu gün Neapol-Bakı Assosiasiyasının təşəbbüsü ilə İtaliyada Neapol meri Luici De Magistrislə Azərbaycan nümayəndə heyəti arasında işgüzar görüş keçirilib.
Qonaqları salamlayan Neapol meri bu görüşdən məmnunluğunu ifadə edərək İtaliya-Azərbaycan dostluq əlaqələrindən və bu əlaqələrin getdikcə möhkəmlənməsindən danışıb. Mer, iki ölkə arasında turizm əlaqələrinin inkişaf etdirilməsində, Bakı və Neapol arasında aviareysin açılmasında maraqlı olduğunu qeyd edib.
Assosiasiyanın prezidenti Cüzeppe Kaniqlia təşkilatın bu günə qədər olan fəaliyyətindən qısa söhbət açıb. Bildirib ki, assosiasiya yarandığı 2014-cü ildən indiyədək İtaliya ilə Azərbaycan arasında mədəni iqtisadi əlaqələrin daha da möhkəmləndirilməsində yaxından xidmət göstərib, bir sıra tədbirlərin təşkilatçısı olub.
Assosiasiya tərəfindən tədbirə dəvət olunan Millət vəkili Qənirə Paşayeva da nümayəndə heyətinə xüsusi diqqət göstərdiyi üçün Neapol merinə minnətdarlıq edib. O, erməni vəhşiliyi nəticəsində törədilən Xocalı qətliamının İtaliya ictimaiyyətinə çatdırılmasında Neapol merinin də xüsusi dəstəyinə ehtiyac olduğunu vurğulayıb.
Assosiasiyanın vitse prezidenti Elnur Camalxanov İtaliyanın ən böyük ticarət tərəfdaşı kimi Azərbaycanın yaxın dostu olduğunu bildirib. Bu dostluq əlaqələrinin yeni mərhələsinin Heydər Əliyevin hakimiyyətinin ilk dövrlərindən başladığını prezidentliyi dövründə isə daha da möhkəmləndiyini diqqətə çatdırıb. Neapol və Bakı arasında qardaşlaşma protokolunun imzalanmasını da məhz H. Əliyevin hakimiyyət illərinə təsadüf etdiyini xatırladıb. Nitqinin sonunda o, Xocalı Soyqırımı qurbanlarının xatirəsinə Neapolda abidə ucaldılması təklifini irəli sürüb.
Sonda tərəflər xatirə şəkli çəkdiriblər və bir-birinə hədiyyələr təqdim ediblər.
