Bakıda dava salan 6 və 88 saylı marşrut avtobuslarının hər iki sürücüsü ilə bağlı sərt tədbirlər görüləcək.

Bakı Nəqliyyat Agentliyinin ictimaiyyətlə əlaqələr və maarifləndirmə şöbəsinin müdiri Nuridə Allahyarova hadisə ilə bağlı öz “Facebook” səhifəsində açıqlama verib.

“Dünən 141 Çağrı mərkəzinə 6 və 88 saylı marşrut xətləri üzrə xidmətdə olan iki sürücü ilə bağlı şikayət daxil oldu və görüntülərdən də məlum oldu ki, sürücülər xidməti vəzifələrinin icrası müddətində əlbəyaxa dava edirlər. Hər iki sürücü ilə bağlı sərt tədbirlər görüləcək.

Daşıyıcı şirkətlərə müraciət edərək bildiririk ki, marşrut xətti heç kəsin şəxsi mülkiyyəti deyil, avtobus isə heç bir sürücünün şəxsi nəqliyyat vasitəsi deyil. Sürücüsü bu cür kobud davranış qaydaları nümayiş etdirən istənilən sahibkar və ya daşıyıcı şirkət bundan sonra təkcə sürücünün cəza alması ilə məsələnin həll olunacağına ümid etməsin. Psixoloji durumu taraz olan, xidməti vəzifəsinin məsuliyyətini dərk edən sürücülərin işə cəlb olunması sahibkarın və daşıyıcı şirkət rəhbərinin vəzifələri sırasındadır”.

11:59

Bakıda sürücülər bir-birini döyüb.

Sosial şəbəkədə yayılan videoda 88 saylı və 6 saylı marşrutun sürücüləri arasında insident yaşandığı görünür. “BakuBus” şirkətinə aid 6 saylı marşrutun sürücüsü ilə 88 saylı “köhnə avtobusun” sürücüsünün davasını orada olan vətəndaşlar da ayırmaqda çətinlik çəkib.

Videonu yayan mənbə qeyd edir ki, bu davaya görə sərnişinlər bir saata yaxın gözləməli olub. Davaya bir avtobusun digərinin qarşısında durması səbəb olub.