Namiq Həsənov “Tarixi birlikdə öyrənək” layihəsində bu dəfə Şərəf xan Bidlisi(bəzən Bitlisi də yazılır) 25 fevral 1543-cü ildə Qum vilayətində Əmir Ş….
Şərəf xan Bidlisi(bəzən Bitlisi də yazılır) 25 fevral 1543-cü ildə Qum vilayətində Əmir Şəmsəddinin ailəsində doğulub. Əmir Şəmsəddin bəy Şərəf xan doğulmazdan 8 il öncə, Sultan Qanuni Süleyman tərəfindən əmirlikdən çıxarılmış, Səfəvilərə sığınmışdı. Şərəf xan 8 yaşında ikən atası tərəfindən Təbrizə göndərilərək I Təhmasibın oğulları ilə birlikdə sarayda oxumuşdu. 1551-ci ildən 1554-cü ilədək tanınmış qızılbaş övladları ilə bərabər şahanə təlim-tərbiyə görmüşdü.
Anası Ərzincan hakimi, Türkman elinin Mosullu oymağından Əmir xanın qızı idi. Şərəf xan 12 yaşında olarkən şah onu Şirvanın Salyan və Mahmudabad bölgəsinə hakim təyin etmişdi. Bölgəni onun adından lələsi Şeyx Əmir bəy Balbasi idarə edirdi.
Hələ atasının hakimiyyəti çağından onların ailəsinə sədaqətlə xidmət edən Şeyx Əmir bəy 1553-cü ildə vəfat etdi. 1556-cı ildə Salyan və Mahmudabad bölgəsi başqasına verildi. Şərəf xana Həmədan vergisindən təqaüd kəsildi.
Lələliyi dayısı oğlu Məhəmmədi bəy Mosullu-Türkman oldu. 1559-cu ilədək Həmədanda yaşadı. Şərəf xan 1566-cı ildə Rojkan (Ruzəki) əyalətinin başçısı təyin olundu.
Qəzvində yaşamağa başladı. Şərəf xan sərkərdə kimi 1568-ci ildə Gılan üsyanında iştirak etmişdi. Giləklərin ayaqlanmasını yatırmaqda xeyli şücaət göstərmişdi.
Şərəf xan 1575-ci ildə Gilandan Qəzvinə qayıtdı. Şah onu yenidən Şirvana göndərdi. Ərəş, Ağdaş, Qəbələ və Bakının gəlirlərindən onun saxlanılmasına xərcləndi.
22 avqust 1576-cı ildə II Şah İsmayıl Səfəvi taxta çıxdı. Şərəf xanı saraya çağırıb, İran kürdlərinə əmirülüməra təyin etdi. Kürdüstan, Luristan və başqa yerlərdə məskunlaşan kürdlər vacib, çətin və müşkül işlərini, ağırlıqlarını, qan davalarını öz əmirləri vasitəsilə Şərəf xana çatdırırdılar.
Saray intriqaları nəticəsində Şərəf xan bu vəzifəsindən kənar edildi. Şərəf xan 1577-ci ildə II Şah İsmayıl tərəfindən Naxçıvana vali göndərildi. 1578-ci ildə taxta Sultan Məhəmməd Xudabəndə çıxdı. Səfəvilər və Osmanlı dövləti arasında savaş başlandı.
Şərəf xan Naxçıvandan Lələ Mustafa paşanın vasitəçiliyi ilə Osmanlı sultanı III Murada məktub yazaraq Osmanlıya bağlılığını bildirən Şərəf xan Sultan III Murad tərəfindən hədiyələr göndərilərək Bitlis bəyliyinə təyin edilmişdi. Şərəf xan Osmanlı sultanı III Murad tərəfindən Qafqaza edilən yürüşdə iştirak etmişdi. Şərəf xan 1597-ci ildə 53 yaşına çatanda xanlıq və hökmdarlığını oğlu Əbul Məali Şəmsəddinə buraxıb tarixlə ilgilənməyə başlamış və "Şərəfnamə" əsərini yazmışdı.
Şərəf xan 1604-cü ildə Bitlisdə vəfat etmişdir. Məzarı Bitlisdə, Şərəfiyyə Külliyəsinin həyətindəki türbənin içindədir. Şərəf xan dayısı oğlu Məhəmmədi bəy Mosullu-Türkmanın qızı ilə ailə qurmuşdu.
Şərəf xan Bidlisinin 1597-ci il tarixində tamamladığı əsər "Şərəfnamə" adlanır. Farsca yazılıb, Şərqi Anadolunun tarixi, bəylikləri, soy kökləri, Bitlis bəyləri anladılır. Dövründə və özündən əvvəl vaqe olan hadisələrdən danışır.
Bu əsər, farscadan başqa türkcə, İngiliscə, ərəbcə və ruscaya tərcümə edilib. Şərəf xanın əsərinin birinci cildi 1967-ci il, ikinci cildi isə, 1976-cı ildə E. İ.
Vasilyeva tərəfindən rus dilinə tərcümə olunub və Moskovada çap edilib. Şərəf xan yazdığı bu əsəri “Eğri Fatehi” olaraq anılan Sultan III Mehmedə ithaf edib…