Rospotrebnadzorun məlumatına əsasən, Rusiyanın İrkutsk vilayətində sanitar-epidemioloji vəziyyət ümumilikdə stabildir, bu barədə APA-nın Moskva bürosu xəbər verib.
Pnevmoniya diaqnozu qoyulmuş qadınla təmasda olmuş şəxslər arasında aparılan testlər iki COVID-19 və bir rinovirus halını aşkar edib. Təmasda olanların təxminən 60%-nin müşahidəsi artıq yekunlaşıb.
Vilayətdə kəskin respirator virus infeksiyalarına yoluxma səviyyəsi epidemioloji həddən 12,6% aşağıdır və uzunmüddətli orta göstəricilərlə uyğun gəlir. Regionda həftəlik təxminən 16 min kəskin respirator virus infeksiyası halı qeydə alınır və son iki həftə ərzində xəstəlik sayında artım müşahidə edilməyib.
Vəba ilə Mübarizə İnstitutunda 28 yaşlı laboratoriya əməkdaşının ölümü ilə bağlı yayılan xəbərlərdən sonra təxminən 200 nəfər nəzarətə götürülüb və bəzi xəstəxanalarda üç həftəlik karantin tətbiq edildiyi qeyd olunur. Rospotrebnadzor vəba diaqnozunun təsdiq olunmadığını bildirib, Kremlin sözçüsü Dmitri Peskov isə vəziyyətlə bağlı rəsmi ekspert açıqlamalarına istinad etməyi tövsiyə edib.
Əsas mənbə: APA