Vətənim Media xəbər verir ki, Prezident İlham Əliyev oktyabrın 12-də İranın daxili işlər naziri İsgəndər Momeni ilə görüşüb. Söhbətdə Azərbaycan və İranın müvafiq qurumları arasında təhlükəsizlik və ictimai asayişin qorunması sahələrində əməkdaşlığın əhəmiyyəti vurğulanıb. Prezident iranlı nazirin səfərinin ikitərəfli təmasların davamı olduğunu qeyd edib və əvvəlki dövrdə Azərbaycan nümayəndə heyətinin İrana səfərini xatırladıb.
Momeni Prezident Məsud Pezeşkianın salamlarını çatdırıb, Azərbaycanı dost və qardaş ölkə adlandıraraq İranda baş vermiş zəlzələlər və meşə yanğınları zamanı göstərilən humanitar dəstəyə görə təşəkkür edib. O, bölgədəki gərginliyin aradan qaldırılması istiqamətində aparılan danışıqlar barədə də məlumat verib. İlham Əliyev Yaxın Şərqdəki vəziyyətin danışıqlar yolu ilə həll olunacağına ümid etdiyini bildirib. Görüşdə əməkdaşlığın perspektivləri və qarşılıqlı maraq doğuran məsələlər də müzakirə olunub. Prezidentlər İlham Əliyev və Məsud Pezeşkianın son görüşləri, o cümlədən bir neçə gün əvvəl Türkmənistanda baş tutan təmasları da xatırlanıb.
Əsas mənbə: APA