Vətənim Media xəbər verir ki, oktyabrın 12-dən dövlət ümumi təhsil müəssisələrində şagird və müəllimlərin geyim qaydalarına riayət etməsi ilə bağlı monitorinqlər aparılır. Yoxlamalar Nazirlər Kabinetinin qərarları ilə müəyyən edilmiş tələblərin icra vəziyyətini qiymətləndirmək məqsədi daşıyır.
Bakı Şəhəri üzrə Təhsil İdarəsinin məlumatına görə, monitorinqlərdə şagirdlərin məktəbli forması, müəllimlərin isə pedaqoji fəaliyyətə və işgüzar mühitə uyğun geyimi, eləcə də məktəblərdə qaydalara nəzarət və maarifləndirmə işləri araşdırılır. Uyğunsuzluq aşkarlandıqda şagird və müəllimlərlə profilaktik söhbətlər aparılıb, bəzi hallarda valideynlər məktəbə dəvət olunub. Qaydalara uyğun geyinməyənlərin dərsə buraxılmadığı hallar da qeydə alınıb.
İdarə bəzi məktəblərdə tədrisə mane olan və məktəb əmlakına ziyan vuran davranışların, həmçinin qaydaların icrası ilə bağlı müəllim və məktəb rəhbərliyinə təzyiq və təhdidlərin müşahidə edildiyini bildirib. Monitorinqlərin davam etdirilməsi planlaşdırılır.
Əsas mənbə: APA