Vətənim Media xəbər verir ki, oktyabrın 13-də Azərbaycan Prezidenti İlham Əliyev Laos Xalq Demokratik Respublikasının Prezidenti Thonqlun Sisulitlə geniş tərkibdə görüş keçirib. Təkbətək görüşdən sonra nümayəndə heyətlərinin iştirakı ilə davam edən müzakirələrdə siyasi və iqtisadi əlaqələr, eləcə də qarşılıqlı maraq doğuran digər sahələr nəzərdən keçirilib.
İlham Əliyev ölkələr arasında siyasi münasibətlərin yüksək səviyyədə olduğunu, iqtisadi əməkdaşlıq göstəricilərinin isə mövcud potensialı əks etdirmədiyini bildirib. O, Laosda praktiki investisiya layihələrinin araşdırılmasına və biznes dairələrinin bu imkanları dəyərləndirməsinə hazır olduqlarını qeyd edib. Prezident həmçinin Sisulitin səfərinin Laos dövlət başçısının Azərbaycana ilk rəsmi səfəri olduğunu vurğulayıb.
Thonqlun Sisulit səfəri iki ölkə arasında dövlət başçısı səviyyəsində baş tutan ilk səfər kimi tarixi mərhələ adlandırıb. Onun sözlərinə görə, 1995-ci ildə diplomatik əlaqələr qurulandan bəri tərəflər dostluq və əməkdaşlığı daha sıx tərəfdaşlığa çevirmək niyyətindədirlər. Laos Prezidenti 1982-ci ildəki səfərindən sonra Azərbaycanın inkişafını görməyin onda böyük təəssürat yaratdığını da bildirib.
Əsas mənbə: APA