Vətənim Media xəbər verir ki, Azərbaycanın xarici işlər naziri Ceyhun Bayramov ölkəmizdə səfərdə olan BMT Turizminin Baş katibi Şeyxa Əl-Nuveys ilə görüşüb. XİN-in APA-ya verdiyi məlumata görə, tərəflər Azərbaycanla təşkilat arasında əməkdaşlığın hazırkı vəziyyətini və inkişaf perspektivlərini, eləcə də ölkənin turizm potensialının beynəlxalq səviyyədə tanıdılmasını müzakirə ediblər.
Görüşdə mədəni irs, ekoturizm, kənd, dağ, sağlamlıq, qış və işgüzar turizm imkanları, qastronomik turizmin təşviqi və beynəlxalq nəqliyyat bağlantılarının genişləndirilməsi barədə danışılıb. İşğaldan azad edilmiş ərazilərdə bərpa və yenidənqurma işləri, mədəni və dini irsin qorunması, yeni turizm istiqamətlərinin yaradılması da müzakirə olunub.
Bayramov Baş katibi vəzifəyə seçilməsi münasibətilə yenidən təbrik edib və uğurlar arzulayıb. Şeyxa Əl-Nuveys Azərbaycanın təşkilatda fəal üzvlüyünə görə təşəkkür edib, BMT Turizminin planları və prioritetləri barədə məlumat verib.
Əsas mənbə: APA