Vətənim Media xəbər verir ki, Qırğızıstanın mədəniyyət nazirinin müavini Soyuzbek Nadırbekov Bakı ilə Bişkek arasında mədəni və humanitar əlaqələrin möhkəmləndiyini bildirib. O, bunu Bakıda keçirilən beynəlxalq təşkilatların yüksək səviyyəli görüşü və Bakı Prosesi çərçivəsində nazirlərin görüşünün birgə sessiyasında deyib.
Nadırbekovun sözlərinə görə, Ağdam rayonunda Ayköl Manas məktəbinin, Bişkekdə isə Heydər Əliyev və Nizami Gəncəvi adına məktəblərin, eləcə də Qırğızıstan-Azərbaycan Dostluq Parkının açılması əməkdaşlığın nümunələridir. O, Bakı Prosesinin xalqlar arasında qarşılıqlı anlaşma və mədəni əməkdaşlıq üçün beynəlxalq platformaya çevrildiyini, mədəniyyətlərarası dialoqun konkret birgə layihələrlə dəstəklənməsinin vacibliyini vurğulayıb.
Qırğızıstan rəsmisi iki ölkə arasındakı münasibətlərin Azərbaycan Prezidenti İlham Əliyev və Qırğızıstan Prezidenti Sadır Japarovun siyasi iradəsi və şəxsi iştirakı ilə inkişaf etdiyini qeyd edib. APA-nın məlumatına görə, görüşdə Bakı Prosesi çərçivəsində əməkdaşlıq müzakirə olunub.
Əsas mənbə: APA