Vətənim Media xəbər verir ki, Azərbaycanın Təbrizdəki Baş Konsulluğunda 8 Noyabr – Zəfər Gününə həsr olunmuş tədbir keçirilib. APA-nın məlumatına görə, tədbirdə İranın Şərqi Azərbaycan vilayətinin və Təbrizin rəsmiləri, Türkiyənin Təbrizdəki baş konsulu, eləcə də şəhərdə yaşayan və təhsil alan Azərbaycan vətəndaşları iştirak ediblər. Şəhidlərin xatirəsi bir dəqiqəlik sükutla yad olunub, videoçarx nümayiş etdirilib və foto sərgi təşkil olunub.
Baş konsul Taleh Zöhrabov çıxışında Zəfər Gününün Azərbaycan xalqının birliyini, dövlətin qüdrətini və milli iradəni təcəssüm etdirdiyini bildirib. İştirakçılara azad edilmiş ərazilərdəki bərpa-quruculuq işləri, sakinlərin qayıdışı, sülh gündəliyi və regional əməkdaşlıq barədə məlumat verilib.
Tədbirdə Azərbaycan-İran sərhədinin işğaldan azad edilmiş 132 kilometrlik hissəsində aparılan quruculuq işlərindən, avtomobil və dəmir yollarından, həmçinin Ağbənd-Kəlalə avtomobil körpüsünün tikintisindən danışılıb. Bildirilib ki, bu layihələr iki ölkə və sərhədyanı bölgələr arasında iqtisadi əlaqələrin genişlənməsinə xidmət edəcək. Sonda Baş Konsulluğun rəsmi ziyafəti təşkil olunub.
Əsas mənbə: APA
Orijinal paylaşım
