Vətənim Media xəbər verir ki, APA-nın Reuters-ə istinadən yaydığı məlumata görə, İranın cənubundakı Qeşm adasında və Cask limanında partlayış səsləri eşidilib. İranın dövlət mediası partlayışların ABŞ hücumları ilə deyil, ölkənin hərbi qüvvələrinin fəaliyyəti ilə bağlı ola biləcəyini bildirib. İran rəsmiləri ərazilərə raket zərbələri endirildiyini təsdiqləməyib. Qeşm adasına iki raketin düşməsi barədə məlumatlar da müstəqil şəkildə təsdiqlənməyib.
İran İslam İnqilabı Keşikçiləri Korpusunun Hərbi Dəniz Qüvvələri Hörmüz boğazında iki neft tankerinin mina ilə toqquşduqdan sonra alovlandığını açıqlayıb. İran tərəfinin bildirdiyinə görə, gəmilər icazəsiz marşrutla hərəkət edib. ABŞ Mərkəzi Komandanlığı isə Oman körfəzində İran limanından çıxaraq bölgəni tərk etməyə çalışan kommersiya gəmisinin vurulub hərəkətsiz vəziyyətə salındığını bildirib. ABŞ tərəfi gəminin xəbərdarlıqlara məhəl qoymadığını və İrana qarşı dəniz blokadasını pozmağa çalışdığını iddia edib. İnsidentlərə dair məlumatlar müstəqil mənbələr tərəfindən təsdiqlənməyib.
Əsas mənbə: APA