Vətənim Media xəbər verir ki, ABŞ Prezidenti Donald Tramp İranın quru sərhədləri və Xəzər dənizi vasitəsilə silah daşınmasının qarşısını almaq məqsədilə yaradılan “Iron Gate” işçi qrupunun fəaliyyətə başladığını açıqlayıb. APA-nın məlumatına görə, Tramp qrupun İran İslam Respublikasında tam fəaliyyət göstərdiyini və dəniz blokadası ilə birlikdə ölkəyə giriş-çıxışın, demək olar, dayandırıldığını bildirib.
ABŞ Silahlı Qüvvələrinin Mərkəzi Komandanlığı noyabrın 7-də yaratdığı qrupun digər dövlət qurumları ilə koordinasiyalı işləyəcəyini Pentaqon açıqlayıb. Qrupun vəzifələrinə qabaqcıl silah sistemlərinin, ikili təyinatlı texnologiyaların və sanksiyalı materialların daşınmasının, eləcə də İranın qanunsuz gəlir əldə etməsi üçün istifadə olunduğu bildirilən kanalların qarşısının alınması daxildir. Tramp qrupun İran ərazisində konkret necə fəaliyyət göstərdiyini açıqlamayıb.
Əsas mənbə: APA