Namiq Həsənov “Tarixi birlikdə öyrənək” layihəsində bu dəfə Dilrubə Camalova — həyatı və yaradıcılığı.
Dilrubə Camalova 1938-ci il yanvarın 7-də Lənkəran şəhərində doğulub. 1955-ci ildə Yardımlıda orta məktəbi, 1960-cı ildə ali məktəbi, 1987-ci ildə isə Bakı Ali Partiya Məktəbini bitirib. Əmək fəaliyyətinə Lənkəran şəhər 2 saylı orta məktəbində müəllimlikdən başlayıb.
1960–1972-ci illərdə müəllim, 1972–1975-ci illərdə Lənkəran Şəhər Xalq Maarif Şöbəsinin müdiri vəzifəsində işləyib 1975–1981-ci illərdə Lənkəran Şəhər Partiya Komitəsinin ikinci katibi, 1981–1988-ci illərdə Lənkəran Şəhər Partiya Komitəsinin birinci katibi, 1989–1992-ci illərdə Azərbaycan Pedaqoji Kadrların İxtisasının Artırılması və Yenidən Hazırlanması Baş İnstitutunun Lənkəran filialında müəllim, direktor müavini, direktor, 1992–1993-cü illərdə Lənkəran Dövlət Universitetinin prorektoru, 1993–2000-ci illərdə Lənkəran Şəhər İcra Hakimiyyətinin başçısı olub. O, Azərbaycan müstəqillik qazanandan sonra bu vəzifəyə təyin oluna ilk xanım olub. Dilrubə Camalova 2000–2006-cı illərdə Azərbaycan Respublikası Qadın Problemləri üzrə Dövlət Komitəsi sədrinin birinci müavini vəzifəsində çalışıb.
1965–1990-cı illərdə Lənkəran şəhər və rayon sovetlərinin deputatı, İcraiyyə Komitəsinin üzvü olub. 1972–1990-cı illərdə ardıcıl olaraq Lənkəran Şəhər Partiya Komitəsinin üzvü və büro üzvü, 1985-ci ildə Azərbaycan SSR Ali Sovetinin deputat və Ali Sovetin Rəyasət Heyətinin üzvü seçilib. "Qırmızı Əmək Bayrağı", "Oktyabr İnqilabı" ordenləri və bir çox medallarla təltif olunub 1988-ci ildə Heydər Əliyevin əleyhinə Mərkəzi Komitənin plenumunda və Ali Sovetin sessiyasında çıxış etmədiyinə görə Azərbaycan KP MK-nın rəhbərliyi tərəfindən Lənkəran Şəhər Partiya Komitəsinin birinci katibi vəzifəsindən azad edilib. Xarici və daxili düşmənlərin fitvası ilə qondarma "Talış-Muğan Respublikası" "yaradan" Əlikram Hümbətov və onu dəstəkləyənlərə qarşı qətiyyətlə mübarizə aparıb.
2009-cu il martın 13-də Cəlilabad rayonunda avtomobil qəzasında həlak olub. ALLAH RƏHMƏT ELƏSİN!