Vətənim Media xəbər verir ki, “Azərpoçt” MMC-nin rəhbər heyəti Bakıda keçirilən “PostEurop” Baş Assambleyası və Biznes Forumu çərçivəsində təşkilatın Baş katibi Botond Szebeny və İdarə Heyətinin sədri Elena Fernandez-Rodriguez ilə görüşüb. Tərəflər qlobal dəyişikliklər fonunda poçt operatorlarının dayanıqlılığını və müştəri ehtiyaclarına uyğun xidmətlərin göstərilməsini müzakirə ediblər.
Söhbət zamanı fəaliyyətin fasiləsizliyi, transsərhəd ticarət və logistika, xidmətlərin əlçatanlığı və iqtisadi səmərəlilik diqqət mərkəzində olub. Elektron ticarətin genişlənməsi, texnoloji yeniliklər və gömrük qaydalarındakı dəyişikliklərin poçt sektorunun iş modelinə təsiri, eləcə də şəbəkələrin logistika, maliyyə və rəqəmsal xidmətlər üzrə imkanlarının artırılması barədə fikir mübadiləsi aparılıb.
“Azərpoçt”un transformasiyasının rəqəmsal ekosistemin digər xidmətləri ilə əlaqəli inkişafı, o cümlədən poçt xidmətlərinin telekommunikasiya və rəqəmsal platformalarla uzlaşdırılması müzakirə olunub. Görüşdə “PostEurop”la əməkdaşlığın əməliyyat dayanıqlılığına, xidmətlərin keyfiyyət və əlçatanlığının yüksəldilməsinə töhfəsi də nəzərdən keçirilib. Forum 7–8 oktyabr 2026-cı ildə Bakıda keçirilib və Avropa poçt operatorlarını, beynəlxalq təşkilatların nümayəndələrini və sektor təmsilçilərini bir araya gətirib.
Əsas mənbə: APA